The Reclining of the Messenger of Allah - Mbështetja e të Dërguarit të Allahut - باب ما جاء في تكأة رسول الله صلى الله عليه وسلم

Na ka treguar Abbas bin Muhamed ed-Duri el-Bagdadi, i cili ka thënë: Na ka treguar Is’hak bin Mensur, nga Israili, nga Simak bin Harbi, e ky nga Xhabir bin Semure, i cili ka thënë: E kam parë të Dërguarin e Allahut (paqja dhe bekimet e Allahut qofshin mbi të) të mbështetur në një jastëk, në anën e tij të majtë.

Na ka treguar Humejd bin Mes’adeh, i cili ka thënë: Na ka treguar Bishr bin el-Mufadal, i cili ka thënë: Na ka treguar el-Xhurejri, nga Abdurrahman bin Ebi Bekrete, e ky nga babai i tij, i cili ka thënë: I Dërguari i Allahut (paqja dhe bekimet e Allahut qofshin mbi të) tha: “A t’ju tregoj për më të mëdhatë e gjynaheve të mëdha?” Ata thanë: “Gjithsesi, o i Dërguari i Allahut!” Ai tha: “T’i shoqërosh Allahut dikë tjetër në adhurim dhe mosrespektimi i prindërve.” Pastaj, i Dërguari i Allahut (paqja dhe bekimet e Allahut qofshin mbi të) u ul, ndërkohë që ishte i mbështetur, dhe tha: “Vini re! Edhe dëshmia e rreme (apo fjala e rreme).” Ai vazhdoi ta përsëriste këtë aq shumë, saqë ne thamë: “Ah, sikur të heshtte!”

Na ka treguar Kutejbe bin Seidi, i cili ka thënë: Na ka treguar Sheriku, nga Ali bin el-Akmeri, e ky nga Ebu Xhuhejfeja, i cili ka thënë: I Dërguari i Allahut (paqja dhe bekimi i Allahut qofshin mbi të) ka thënë: Sa më përket mua, unë nuk ha i mbështetur.

Na ka treguar Muhamed bin Beshari, i cili ka thënë: Na ka treguar Abdurrahman bin Mehdiu, i cili ka thënë: Na ka treguar Sufjani, nga Ali bin el-Akmeri, i cili ka thënë: E kam dëgjuar Ebu Xhuhejfën duke thënë: I Dërguari i Allahut (paqja dhe bekimet e Allahut qofshin mbi të) ka thënë: Unë nuk ha i mbështetur.

Na ka treguar Jusuf bin Isai, i cili ka thënë: Na ka treguar Vakiu, i cili ka thënë: Na ka treguar Israili, nga Simak bin Harbi, e ky nga Xhabir bin Semure, i cili ka thënë: E kam parë të Dërguarin e Allahut (paqja dhe bekimet e Allahut qofshin mbi të) të mbështetur mbi një jastëk.