Transmeton babai i Abdullah bin Unejsit: Isha në një tubim të fisit Beni Selime dhe isha më i riu prej tyre. Ata thanë: "Kush do ta pyesë të Dërguarin e Allahut (s.a.v.s.) për ne rreth Natës së Kadrit?" Kjo ndodhi në mëngjesin e ditës së njëzet e një të Ramazanit. Dola dhe fala namazin e akshamit bashkë me të Dërguarin e Allahut (s.a.v.s.). Pastaj qëndrova te dera e shtëpisë së tij. Ai kaloi pranë meje dhe më tha: "Hyr brenda." Hyra brenda dhe atij i sollën darkën. Unë u përmbajta nga ngrënia pasi ushqimi ishte i pakët. Kur mbaroi darkën, më tha: "Më jep këpucët e mia." Ai u ngrit dhe unë u ngrita bashkë me të. Ai më tha: "Duket se ke ndonjë nevojë." I thashë: "Po, një grup njerëzish nga fisi Beni Selime më kanë dërguar te ju që t'ju pyes rreth Natës së Kadrit." Ai pyeti: "Cila natë është sonte?" I thashë: "E njëzet e dyta." Ai tha: "Kjo është ajo natë." Pastaj u kthye dhe tha: "Ose nata pasuese", duke pasur për qëllim natën e njëzet e tretë.