1603 - Na ka treguar Ibn Ebi Davudi, i cili ka thënë: Na ka treguar El-Vuadhi, i cili ka thënë: Na ka treguar Sulejman bin Bilali, i cili ka thënë: Na ka treguar Sherik bin Ebi Nemri, se Kurejbi e ka njoftuar atë se e ka dëgjuar Ibn Abbasin duke thënë: "Fjeta një natë te i Dërguari i Allahut (s.a.v.s.). Kur u largua nga namazi i jacisë, u largova bashkë me të. Kur hyri në shtëpi, i fali dy rekate të lehta, rukuja e të cilave ishte sa sexhdeja e tyre, dhe sexhdeja e tyre ishte sa qëndrimi i tyre në këmbë. Pastaj u shtri në vendin e tij të faljes derisa ia dëgjova gërhitjen. Pastaj u zgjua, mori abdest dhe i fali dy rekate po ashtu. Pastaj u shtri për herë të dytë në vendin e tij dhe fjeti derisa ia dëgjova gërhitjen. Këtë e bëri pesë herë, kështu që i fali dhjetë rekate, pastaj e fali vitrin me një rekat. Atëherë i erdhi Bilali (r.a.) dhe e njoftoi për namazin e sabahut. Ai i fali dy rekate dhe pastaj doli për në namaz." ⁽⁹⁸⁶⁾.

Në këtë hadith ai ka njoftuar se ai (s.a.v.s.) i ka falur dhjetë rekate dhe pastaj e ka falur vitrin me një rekat. Ekziston mundësia që ai ta ketë falur vitrin me një rekat së bashku me dy rekate që i kanë paraprirë atij, kështu që ato së bashku me këtë një rekat bëhen tre, në mënyrë që kuptimi i këtij hadithi të jetë në përputhje me kuptimin e hadithit të Ali bin Abdullahut, Said bin Xhubejrit dhe Jahja bin El-Xhezzarit.

Pastaj pamë nëse është transmetuar prej tij diçka që e sqaron këtë?