3574 - Na ka treguar Muhamed bin Huzejme, i cili ka thënë: Na ka treguar Haxhaxhi, i cili ka thënë: Na ka njoftuar Hamadi, nga Bishr bin Harbi, nga Ebu Seid el-Hudriu: Se i Dërguari i Allahut (s.a.v.s.) lutej në Arafat dhe i ngrinte duart e tij deri në lartësinë e gjoksit ^(366)(367).

Dëshiruam të shqyrtojmë nëse ngritja e duarve gjatë shikimit të Shtëpisë (Qabes) është e tillë apo jo? Pamë se ata që anuan nga ky mendim, e bënë këtë jo për shkak të ihramit, por për nderim të Shtëpisë.

Kemi parë se ngritja e duarve e urdhëruar në Arafat, Muzdelife, te dy xhemratet, mbi Safa dhe Merue, është urdhëruar vetëm si formë lutjeje në vendet ku qëndrimi në to është bërë për shkak të ihramit.

Gjithashtu kemi parë se kushdo që shkon në Arafat, Muzdelife, në vendin e hedhjes së guralecëve, ose në Safa dhe Merue, duke mos qenë në ihram, ai nuk i ngre duart për të nderuar asnjë prej këtyre vendeve.

Kur u vërtetua se ngritja e duarve nuk urdhërohet në këto vende përveçse për shkak të ihramit, dhe nuk urdhërohet jashtë ihramit, atëherë po ashtu nuk urdhërohet ngritja e duarve me rastin e shikimit të Shtëpisë jashtë ihramit. E nëse vërtetohet se nuk urdhërohet jashtë ihramit, vërtetohet se nuk urdhërohet as brenda ihramit.

Një argument tjetër: Kemi parë se vendet ku urdhërohet ngritja e duarve gjatë ihramit janë ato vende ku është urdhëruar qëndrimi (uukuf), siç i përmendëm. Kemi parë gjithashtu se Xhemratul Akabe është një xhemre si xhemretet e tjera, mirëpo meqë te ajo nuk ka qëndrim, atëherë aty nuk ka ngritje duarsh. Rrjedhimisht, analogjia (kijasi) dhe shqyrtimi tregojnë se meqë te Shtëpia nuk ka qëndrim, atëherë nuk duhet të ketë as ngritje duarsh, bazuar në atë që përmendëm. Kjo që vërtetuam përmes shqyrtimit është mendimi i Ebu Hanifes, Ebu Jusufit dhe Muhamedit, Allahu i mëshiroftë. Lidhur me këtë është transmetuar diçka edhe nga Ibrahim en-Nehaiu.