3624 - Na ka treguar Ali bin Ma'bed, i cili ka thënë: Na ka treguar Shubabe bin Suvar (h)
dhe na ka treguar Husejn bin Nasr, i cili ka thënë: Na ka treguar Abdurrahman bin Zijad (h)
dhe na ka treguar Ibrahim bin Merzuk, i cili ka thënë: Na ka treguar Ebu Davudi, të cilët kanë thënë: Na ka treguar Shu'be, nga Kajs bin Muslim, i cili ka thënë: Kam dëgjuar Tarik bin Shihabin duke treguar nga Ebu Musa el-Esh'ari (r.a.) se ka thënë: Erdha te i Dërguari i Allahut (s.a.v.s.) kur ai ishte i ndalur në El-Batha, dhe ai më tha: "Me çfarë e ke bërë nijetin (ihramin)?" Thashë: Me një nijet si nijeti i Pejgamberit (s.a.v.s.). Atëherë i Dërguari i Allahut (s.a.v.s.) tha: "Ke vepruar mirë. Bëj tavaf rreth Shtëpisë, dhe midis Safasë e Merves, pastaj dil nga ihrami." Kështu veprova. Pastaj shkova te një grua nga fisi Kajs, e cila më pastroi ⁽⁴²⁷⁾ kokën. Vazhdova t'u jepja fetva njerëzve për këtë derisa erdhi koha e Omer bin el-Hatabit (r.a.). Një burrë më tha: O Abdullah bin Kajs, ngadalëso me disa nga fetvatë e tua, sepse ti nuk e di se çfarë ka sjellë të re Prijësi i Besimtarëve në ritet e haxhit pas teje. Atëherë thashë: O njerëz, ai të cilit i kemi dhënë fetva, le të presë ⁽⁴²⁸⁾, sepse Prijësi i Besimtarëve po vjen, andaj ndiqeni atë.

Kur erdhi Omeri, shkova tek ai dhe ia përmenda këtë. Omeri (r.a.) më tha: Nëse i përmbahemi Librit të Allahut, Libri i Allahut na urdhëron për plotësimin (e haxhit dhe umres), e nëse i përmbahemi sunetit të të Dërguarit të Allahut (s.a.v.s.), i Dërguari i Allahut (s.a.v.s.) nuk doli nga ihrami derisa kurbani arriti vendin e tij ⁽⁴²⁹⁾.