94 - Na ka treguar Ebu Davudi, i cili ka thënë: Na ka treguar Shube, i cili ka thënë: Na ka njoftuar el-Hakemi, i cili ka thënë: Kam dëgjuar Ibn Ebi Lejla, i cili ka thënë:
Na ka treguar Ali b. Ebi Talibi (r.a.) se Fatimja (r.a.) u ankua për gjurmët që i kishte lënë rrotullimi i mokrës në dorën e saj. Pejgamberit (s.a.v.s.) i sollën disa robër lufte, kështu që ajo shkoi (për të kërkuar një shërbëtor), por nuk e gjeti atë. Ajo takoi Aishen (r.a.) dhe e njoftoi atë. Kur erdhi Pejgamberi (s.a.v.s.), Aisha e njoftoi për ardhjen e Fatimes te ai. Pejgamberi (s.a.v.s.) erdhi tek ne kur ne kishim rënë në shtrat. Ne u përpoqëm të ngriheshim, por i Dërguari i Allahut (s.a.v.s.) tha: "Qëndroni në vendet tuaja." Ai u ul mes nesh, saqë unë ndjeva ftohtësinë e këmbëve të tij në gjoksin tim, dhe tha: "A t'ju mësoj diçka më të mirë se ajo që kërkuat? Kur të shkoni në shtratin tuaj, thoni 'Allahu Ekber' tridhjetë e katër herë, 'Subhanallah' tridhjetë e tri herë dhe 'Elhamdulilah' tridhjetë e tri herë. Kjo është më e mirë për ju sesa një shërbëtor."