Transmeton Ibn Abbasi: Kur Allahu i Madhëruar shpalli ajetet: "Dhe mos iu afroni pasurisë së jetimit, përveçse në mënyrën më të mirë" dhe "Vërtet, ata që e hanë pasurinë e jetimëve padrejtësisht", secili që kishte një jetim nën kujdes filloi ta ndante ushqimin dhe pijen e tij nga ushqimi dhe pija e jetimit. Ushqimi që tepronte lihej mënjanë derisa jetimi ta hante vetë ose derisa të prishej. Kjo gjë u ra rëndë atyre, prandaj ia përmendën këtë të Dërguarit të Allahut (s.a.v.s.). Atëherë Allahu i Madhëruar shpalli ajetin: "Të pyesin ty për jetimët. Thuaj: 'Të bësh atë që është në dobi të tyre është më e mira; e nëse i bashkoni punët tuaja me të tyret, ata janë vëllezërit tuaj'." Pas kësaj, ata e bashkuan ushqimin dhe pijen e tyre me atë të jetimëve.