269 - Na ka treguar Ebu Davudi, i cili ka thënë: Na ka treguar Zaideja, nga Mensuri, nga Ibrahimi, nga Alkameja, nga Abdullah bin Mes'udi, i cili ka thënë: "Na priu në namaz i Dërguari i Allahut (s.a.v.s.) dhe ose shtoi, ose pakësoi diçka - ndërsa ai që e ka harruar këtë (nëse ishte shtim apo pakësim) është Ibrahimi nga Alkameja, ose Alkameja nga Abdullahu - e kur e përfundoi namazin e tij, i u tha: O i Dërguari i Allahut, a ka ndodhur ndonjë gjë e re në namaz? Ai tha: 'Jo, e çfarë është ajo?' Atëherë ia përmendëm atë që kishte bërë, kështu që ai i përkuli këmbët e tij, u kthye nga Kibla, pastaj i bëri dy sexhde, pastaj u kthye nga ne me fytyrën e tij dhe tha: 'Sikur të ndodhte diçka e re në namaz, unë do t'ju njoftoja, por unë jam njeri sikurse ju, harroj ashtu siç harroni ju, andaj kur të harroj, ma kujtoni. Dhe cilido prej jush që ka dyshim në namazin e tij, le të shikojë atë që është më afër të saktës dhe le ta plotësojë mbi të, pastaj le të japë selam e pastaj t'i bëjë dy sexhde'".