Transmeton Ibn Umeri: Ai e jepte tokën e tij me qira derisa i erdhi lajmi se Rafi' bin Hadixh el-Ensariu kishte treguar se i Dërguari i Allahut (s.a.v.s.) e kishte ndaluar dhënien e tokës me qira. Atëherë Abdullah bin Umeri i tha: “O Ibn Hadixh, çfarë po transmeton nga i Dërguari i Allahut (s.a.v.s.) lidhur me dhënien e tokës me qira?” Rafi’u iu përgjigj Abdullah bin Umerit: “I kam dëgjuar dy axhallarët e mi, të cilët ishin të pranishëm në betejën e Bedrit, duke u treguar anëtarëve të familjes se i Dërguari i Allahut (s.a.v.s.) e kishte ndaluar dhënien e tokës me qira.” Abdullahu tha: “Pasha Allahun, unë e dija mirë se toka jipej me qira në kohën e të Dërguarit të Allahut (s.a.v.s.).” Mirëpo, më pas Abdullahu u frikësua se mos i Dërguari i Allahut (s.a.v.s.) kishte sjellë ndonjë vendim të ri për këtë çështje që ai nuk e dinte, prandaj hoqi dorë nga dhënia e tokës me qira.

Ebu Davudi ka thënë: Ky hadith është përcjellë gjithashtu nga Ejubi, Ubejdullahu, Kethir bin Farkad dhe Maliku, nga Nafiu, nga Rafi’u, nga Pejgamberi (s.a.v.s.). Gjithashtu është transmetuar nga El-Evzaiu, nga Hafs bin Inan el-Hanefiu, nga Nafiu, nga Rafi’u, i cili ka thënë: “E kam dëgjuar të Dërguarin e Allahut (s.a.v.s.)”. Ngjashëm është transmetuar nga Zejd bin Ebi Unejsa, nga El-Hekemi, nga Nafiu, nga Ibn Umeri se ai kishte shkuar te Rafi’u dhe e kishte pyetur: “A e ke dëgjuar të Dërguarin e Allahut (s.a.v.s.)?” Ai u përgjigj: “Po”. Po ashtu, Ikrime bin Ammari ka transmetuar nga Ebu Nexhashiu, nga Rafi’ bin Hadixhi, i cili ka thënë: “E kam dëgjuar Pejgamberin (s.a.v.s.)”. Është transmetuar edhe nga El-Evzaiu, nga Ebu Nexhashiu, nga Rafi’ bin Hadixhi, nga axha i tij Zuhejr bin Rafi’, nga Pejgamberi (s.a.v.s.). Ebu Davudi ka thënë: Emri i Ebu Nexhashiut është Ata bin Suhejb.