Transmeton Ibn Abbasi:

Ai pati një mospajtim me Hur bin Kajs bin Hisn el-Fezariun lidhur me shokun e Pejgamberit Musait. Ndërkohë, pranë tyre kaloi Ubejj bin Ka'bi dhe Ibn Abbasi e thirri atë duke i thënë: "Unë dhe ky shoku im kemi një mospajtim rreth shokut të Musait, të cilin ai kërkoi ta takonte. A e ke dëgjuar të Dërguarin e Allahut (s.a.v.s.) duke përmendur diçka rreth tij?" Ubejj bin Ka'bi u përgjigj: "Po, e kam dëgjuar Pejgamberin (s.a.v.s.) duke treguar për të e duke thënë: 'Përderisa Musai ishte i ulur me një grup nga bijtë e Izraelit, erdhi një burrë dhe e pyeti: "A njeh ndonjë që është më i ditur se ti?" Musai u përgjigj: "Jo." Atëherë Allahu i Madhëruar i shpalli Musait: "Përkundrazi, robi Ynë, Hidri, është më i ditur se ti." Musai pyeti se si mund ta takonte atë, kështu që Allahu e bëri peshkun si shenjë për të dhe i u tha: "Kur ta humbasësh peshkun, kthehu mbrapa, sepse aty do ta takosh atë." Musai (s.a.v.s.) vazhdoi duke ndjekur gjurmën e peshkut në det. Shërbëtori i Musait i tha atij: "A e vure re kur u strehuam tek shkëmbi? Unë e harrova peshkun dhe vetëm shejtani bëri që unë ta harroj ta përmend atë." Musai tha: "Kjo është ajo që ne po kërkonim." Kështu ata u kthyen prapa duke ndjekur gjurmët e tyre dhe gjetën Hidrin. Ndërsa ajo që ndodhi më tej mes tyre është treguar nga Allahu në Librin e Tij.'"