Transmeton Enesi: Një burrë hyri në xhami ditën e xhuma nga një derë që ishte përballë Darul-Kadasë, ndërkohë që i Dërguari i Allahut (s.a.v.s.) ishte në këmbë duke mbajtur hytben. Burri u ndal përballë të Dërguarit të Allahut (s.a.v.s.) dhe tha: "O i Dërguari i Allahut, bagëtia po ngordh dhe rrugët janë ndërprerë, andaj lute Allahun të na dërgojë shi." I Dërguari i Allahut (s.a.v.s.) i ngriti duart dhe tha: "O Allah, na jep shi! O Allah, na jep shi! O Allah, na jep shi!" Enesi shtoi: "Për Allahun, ne nuk shihnim në qiell asnjë re, as edhe një copëz reje, dhe mes nesh e malit Sila' nuk kishte asnjë shtëpi apo ndërtesë. Pastaj, pas atij mali u shfaq një re në formë të mburojës dhe kur arriti në mes të qiellit, u shpërnda dhe filloi të bjerë shi. Për Allahun, ne nuk e pamë diellin për gjashtë ditë me radhë. Të xhumanë tjetër, një burrë hyri nga e njëjta derë ndërkohë që i Dërguari i Allahut (s.a.v.s.) ishte në këmbë duke mbajtur hytben. Ai u ndal para tij dhe tha: 'O i Dërguari i Allahut, pasuria po shkatërrohet dhe rrugët janë ndërprerë, andaj lute Allahun ta ndalë shiun për ne.'" Enesi tha: "I Dërguari i Allahut (s.a.v.s.) i ngriti duart dhe tha: 'O Allah, rreth nesh e jo mbi ne! O Allah, mbi kodra, male, rrafshnalta, nëpër lugina dhe në vendet ku rriten pemët!'" Enesi shtoi: "Shiu pushoi dhe ne dolëm duke ecur në diell." Sheriku e pyeti Enesin nëse ishte i njëjti person që kishte kërkuar shiun të xhumanë e kaluar, por ai u përgjigj se nuk e dinte.