Transmeton Abdullah bin Umari: Në kohën e Pejgamberit (s.a.v.s.), kushdo që shihte një ëndërr, ia tregonte atë të Dërguarit të Allahut (s.a.v.s.). Unë kisha dëshirë të shihja një ëndërr për t'ia treguar të Dërguarit të Allahut (s.a.v.s.). Isha një djalosh i ri dhe në kohën e të Dërguarit të Allahut (s.a.v.s.) flija në xhami. Pashë në ëndërr sikur dy melaqe më kapën dhe më dërguan te Zjarri, i cili ishte i ndërtuar si një pus dhe kishte dy shtylla. Aty pashë njerëz që i njihja dhe fillova të thosha: "I kërkoj mbrojtje Allahut prej Zjarrit." Pastaj na takoi një melaqe tjetër, e cila më tha: "Mos u frikëso." Ia tregova ëndrrën Hafsas, ndërsa Hafsa ia tregoi të Dërguarit të Allahut (s.a.v.s.). Pejgamberi (s.a.v.s.) tha: "Sa burrë i mirë është Abdullahu, sikur të falte namaz nate." Pas kësaj, ai nuk flinte natën veçse pak.