Transmeton Ibn 'Umeri: Në kohën e Pejgamberit (s.a.v.s.) pashë në ëndërr sikur kisha në dorë një copë mëndafshi dhe ajo fluturonte me mua në çdo pjesë të Xhenetit që dëshiroja. Gjithashtu pashë sikur më erdhën dy persona (engjëj) që deshën të më dërgonin në Zjarr. Pastaj na takoi një engjëll i cili më tha të mos kisha frikë dhe u tha atyre që të më linin të lirë. Hafsa ia tregoi një nga ëndrrat e mia Pejgamberit (s.a.v.s.) dhe Pejgamberi (s.a.v.s.) tha: "Abdullahu është burrë i mirë. Ah, sikur ta falte namazin e natës!" Që nga ajo ditë, Abdullahu filloi ta falte namazin e natës. Shokët e Pejgamberit (s.a.v.s.) tregonin ëndrrat e tyre se Nata e Kadrit ishte në natën e njëzet e shtatë të muajit Ramazan. Pejgamberi (s.a.v.s.) tha: "Shoh se ëndrrat tuaja përkojnë për dhjetë netët e fundit, prandaj kushdo që dëshiron ta kërkojë atë, le ta kërkojë në dhjetë netët e fundit të Ramazanit."