Transmeton Ibn Abbasi: I Dërguari i Allahut (s.a.v.s.) erdhi te vendi i pirjes së ujit dhe kërkoi ujë. Abbasi tha: "O Fadl! Shko te nëna jote dhe sill ujë prej saj për të Dërguarin e Allahut (s.a.v.s.)." I Dërguari i Allahut (s.a.v.s.) tha: "Më jep të pi." Abbasi tha: "O i Dërguari i Allahut (s.a.v.s.)! Njerëzit i fusin duart në të." Ai (s.a.v.s.) tha sërish: "Më jep të pi." Kështu, ai piu nga ai ujë e pastaj erdhi te Zemzemi, ku njerëzit po u jepnin ujë të tjerëve dhe po punonin aty. Pejgamberi (s.a.v.s.) u tha atyre: "Vazhdoni punën, sepse jeni duke bërë një vepër të mirë." Pastaj tha: "Sikur të mos kisha frikë se njerëzit do t'ju mposhtnin (duke u shtyrë për të nxjerrë ujë si unë), do të zbritja derisa ta vendosja litarin mbi këtë" – dhe bëri me shenjë nga shpatulla e tij.