Transmeton Xhabir bin Abdullah (r.anhuma): Pejgamberi (s.a.v.s.) dhe shokët e tij hynë në ihram për Haxh dhe askush prej tyre nuk kishte kurban me vete, përveç Pejgamberit (s.a.v.s.) dhe Talhas. Aliu erdhi nga Jemeni dhe kishte me vete një kurban. Ai tha: "Kam bërë nijet për atë që ka bërë nijet Pejgamberi (s.a.v.s.)." Pejgamberi (s.a.v.s.) i urdhëroi shokët e tij që ta shndërronin atë në Umre, të bënin tavaf, të shkurtonin flokët dhe të dilnin nga ihrami, me përjashtim të atyre që kishin kurban me vete. Ata thanë: "Si të shkojmë në Mina ndërkohë që nga organet tona pikon (pas marrëdhënieve)?" Kur kjo i arriti Pejgamberit (s.a.v.s.), ai tha: "Sikur ta kisha ditur më parë atë që di tani, nuk do ta kisha sjellë kurbanin me vete. Sikur të mos kisha kurbanin, do të kisha dalë nga ihrami." Ajshes (r.anha) i erdhën të përmuajshmet, kështu që ajo i kreu të gjitha ritet e Haxhit, përveç tavafit rreth Qabes. Kur u pastrua, ajo e bëri tavafin. Ajo tha: "O i Dërguari i Allahut (s.a.v.s.)! Ju po ktheheni me Haxh dhe Umre, ndërsa unë po kthehem vetëm me Haxh." Atëherë Pejgamberi (s.a.v.s.) urdhëroi Abdur-Rahman bin Ebu Bekrin që ta shoqëronte atë deri në Ten’im, dhe kështu ajo e kreu Umren pas Haxhit.