Transmeton Ali bin Ebi Talibi: Fitova një deve si pjesë e presë së luftës në ditën e Bedrit, ndërsa i Dërguari i Allahut (s.a.v.s.) më dha edhe një deve tjetër. I lashë të dyja të uleshin te dera e njërit prej Ensarëve, me qëllim që të ngarkoja mbi to idhhir (bar aromatik) për ta shitur, e me paratë e fituara të përgatitja gostinë e martesës sime me Fatimen. Me mua ishte një argjendar nga fisi Beni Kajnuka. Hamza bin Abdul-Mutalibi ishte në atë shtëpi duke pirë alkool dhe një këngëtare po këndonte: "O Hamza, thiri ato deve të majme!" Atëherë Hamza u ngrit me shpatë, ua preu gungat, ua çau anët dhe u mori mëlçitë. (I thashë Ibn Shihabit: "A mori edhe nga gungat?" Ai u përgjigj: "Ai ua preu gungat dhe i mori me vete.") Aliu vazhdoi: Kur e pashë atë skenë të tmerrshme, shkova te Pejgamberi (s.a.v.s.) dhe e njoftova për ngjarjen. Pejgamberi (s.a.v.s.) doli bashkë me Zejd bin Harithin dhe unë shkova me ta. Ai hyri te Hamza dhe i foli me rreptësi, ndërsa Hamza ngriti shikimin e tha: "A nuk jeni ju vetëm skllevërit e baballarëve të mi?" Atëherë i Dërguari i Allahut (s.a.v.s.) u tërhoq mbrapa derisa doli jashtë. Kjo ngjarje kishte ndodhur para se të ndalohej alkooli.