Transmeton Ajsheja: Barira erdhi t'i kërkonte ndihmë asaj për shlyerjen e kontratës së saj të lirimit, ndërkohë që deri atëherë nuk kishte paguar asgjë prej saj. Ajsheja i tha: "Kthehu te zotërinjtë e tu dhe, nëse ata pranojnë që unë ta paguaj shumën e mbetur për lirimin tënd me kusht që vela-u (e drejta e mbrojtjes pas lirimit) të më takojë mua, unë do ta bëj këtë." Barira i njoftoi zotërinjtë e saj për këtë, por ata refuzuan dhe thanë: "Nëse ajo dëshiron ta bëjë këtë për të fituar shpërblimin e Allahut, le ta bëjë, por vela-u do të na takojë neve." Ajsheja ia tregoi këtë të Dërguarit të Allahut (s.a.v.s.), i cili i tha: "Bleje dhe liroje atë, sepse vela-u i takon vetëm atij që e liron." Pastaj i Dërguari i Allahut (s.a.v.s.) u ngrit dhe tha: "Çfarë është me disa njerëz që vendosin kushte të cilat nuk gjenden në Librin e Allahut? Kushdo që vendos një kusht që nuk është në Librin e Allahut, ai kusht është i pavlefshëm, edhe nëse e vendos atë njëqind herë. Kushti i Allahut është më i vërteti dhe më i sigurti."