Transmeton Aisheja: Barira erdhi tek unë dhe më tha: "Jam marrë vesh me pronarët e mi për lirimin tim me kusht që t'u jap nëntë uqije ari, nga një uqije çdo vit, andaj më ndihmo." Aisheja i tha: "Nëse ata pranojnë që t'ua paguaj të gjitha menjëherë dhe që uela-i (e drejta e trashëgimisë pas lirimit) të më takojë mua, unë do ta bëj këtë." Barira shkoi te pronarët e saj dhe ua tregoi këtë, por ata refuzuan. Ajo u kthye tek unë ndërkohë që i Dërguari i Allahut (s.a.v.s.) ishte i ulur aty dhe tha: "Ua propozova këtë, por ata insistuan që uela-i t'u takojë atyre." Pejgamberi (s.a.v.s.) dëgjoi këtë, ndërsa Aisheja e njoftoi atë për këtë çështje. Ai i tha: "Blije atë dhe pranoju kushtin e tyre për uela-in, sepse uela-i i takon vetëm atij që e liron (skllavin)." Aisheja veproi kështu. Pastaj, i Dërguari i Allahut (s.a.v.s.) u ngrit para njerëzve, e lavdëroi dhe e madhëroi Allahun, e më pas tha: "Çfarë është me disa njerëz që vendosin kushte që nuk gjenden në Librin e Allahut? Çdo kusht që nuk është në Librin e Allahut është i kotë, qofshin edhe njëqind kushte. Gjykimi i Allahut është më i vërteti dhe kushti i Allahut është më i forti. Uela-i i takon vetëm atij që e liron (skllavin)."