Transmeton Ibn Abbasi: Te i Dërguari i Allahut (s.a.v.s.) u përmendën ata që kryejnë Lianin (betimin e mallkimit). Asim bin Adiu tha diçka rreth kësaj dhe pastaj u largua. Më vonë, një burrë nga fisi i tij erdhi tek ai dhe i tregoi se kishte gjetur një burrë tjetër me gruanin e tij. Me këtë rast, Asimi tha: "Nuk jam sprovuar me këtë çështje përveçse për shkak të asaj që thashë." Asimi e dërgoi burrin te i Dërguari i Allahut (s.a.v.s.) dhe ai e njoftoi për gjendjen në të cilën e kishte gjetur gruan e tij. Ai burrë ishte i zbehtë, eshtak dhe me flokë të drejtë, ndërsa burri tjetër që u gjet me gruan e tij ishte zeshkan, i bëshëm, me pulpa të trasha dhe me flokë kaçurrelë. I Dërguari i Allahut (s.a.v.s.) tha: "O Allah, shfaqe të vërtetën!" Më pas, gruaja lindi një fëmijë që i ngjante burrit për të cilin i shoqi kishte thënë se e kishte gjetur me të. Kështu, i Dërguari i Allahut (s.a.v.s.) urdhëroi që të kryhet Liani mes tyre. Një burrë nga ai tubim i tha Ibn Abbasit: "A ishte ajo gruaja për të cilën i Dërguari i Allahut (s.a.v.s.) ka thënë: 'Sikur të gurëzoja dikë pa dëshmi, do ta gurëzoja këtë grua'?" Ibn Abbasi u përgjigj: "Jo, ajo ishte një grua tjetër e cila shfaqte sjellje të këqija haptazi në Islam."