Transmeton Aishja: Sa'd bin Ebi Vakkasi dhe Abd bin Zam'a u grindën për një djalosh. Sa'di tha: "O i Dërguari i Allahut (s.a.v.s.)! Ky është djali i vëllait tim, Utbe bin Ebi Vakkasit, i cili më porositi se ai ishte djali i tij. Shikoje ngjashmërinë e tij." Ndërsa Abd bin Zam'a tha: "Ky është vëllai im, o i Dërguari i Allahut (s.a.v.s.)! Ai ka lindur në shtratin e babait tim nga robëresha e tij." Pejgamberi (s.a.v.s.) e shikoi djaloshin dhe pa një ngjashmëri të qartë me Utben, andaj tha: "Ai të takon ty, o Abd bin Zam'a, sepse fëmija i takon shtratit, ndërsa për lavirin është guri. Kurse ti, o Seude bint Zam'a, mbulohu prej tij." Aishja shtoi: Që nga ajo kohë, ai nuk e pa më kurrë Seuden.