Transmeton Ibn Abbasi: Një burrë erdhi te i Dërguari i Allahut (s.a.v.s.) dhe tha: "Pashë në ëndërr një re që bënte hije. Prej saj pikonin gjalpë dhe mjaltë, dhe i shihja njerëzit duke i mbledhur me duart e tyre, disa mblidhnin shumë e disa pak. Dhe ja, ishte një litar që shtrihej nga toka deri në qiell; pashë që ti e kape atë dhe u ngjite lart, pastaj një burrë tjetër e kapi dhe u ngjit lart, pastaj një tjetër e kapi dhe u ngjit lart, pastaj një tjetër e kapi, por litari u këput e pastaj u bashkua përsëri." Ebu Bekri tha: "O i Dërguari i Allahut (s.a.v.s.)! Qoftë flijuar babai im për ty! Më lejo ta interpretoj këtë ëndërr." Pejgamberi (s.a.v.s.) i tha: "Interpretoje." Ebu Bekri tha: "Reja me hije simbolizon Islamin, ndërsa gjalpi dhe mjalti që pikojnë prej saj simbolizojnë Kur'anin, ëmbëlsinë e tij që pikon; disa njerëz mësojnë shumë prej Kur'anit e disa pak. Litari që shtrihet nga qielli në tokë është e Vërteta që ti po ndjek. Ti e ndjek atë dhe Allahu do të të lartësojë me të, pastaj një burrë tjetër do ta ndjekë e do të lartësohet me të, pastaj një tjetër do ta ndjekë e do të lartësohet me të, pastaj një tjetër do ta ndjekë, por ai do të këputet e pastaj do të bashkohet për të dhe ai do të lartësohet me të. O i Dërguari i Allahut (s.a.v.s.)! Qoftë flijuar babai im për ty! A kam të drejtë apo kam gabuar?" Pejgamberi (s.a.v.s.) u përgjigj: "Ke pasur të drejtë në disa pjesë dhe ke gabuar në disa." Ebu Bekri tha: "O i Dërguari i Allahut! Për Allahun, duhet të më tregosh se në çfarë kam gabuar." Pejgamberi (s.a.v.s.) tha: "Mos u beto."