Transmeton Enesi:

Pejgamberi (s.a.v.s.) doli pasi dielli kishte filluar të anonte dhe fali namazin e drekës. Pasi dha selamin, ai u ngjit në minber dhe përmendi Çastin e Kiametit, duke treguar se para tij do të ndodhin ngjarje të mëdha. Pastaj tha: "Kush dëshiron të më pyesë për diçka, le të pyesë, sepse pasha Allahun, nuk do të më pyesni për asgjë pa ju treguar unë për të, për aq kohë sa jam në këtë vend timin." Enesi tha: Njerëzit filluan të qanin shumë, ndërsa i Dërguari i Allahut (s.a.v.s.) vazhdonte të thoshte: "Më pyesni!" Atëherë u ngrit një burrë dhe pyeti: "Ku do të jetë vendi im, o i Dërguari i Allahut?" Pejgamberi (s.a.v.s.) tha: "Në zjarr." Pastaj u ngrit Abdullah bin Hudhafeja dhe pyeti: "Kush është babai im, o i Dërguari i Allahut?" Ai u përgjigj: "Babai yt është Hudhafeja." Pastaj ai vazhdoi të thoshte me këmbëngulje: "Më pyesni! Më pyesni!" Atëherë Omeri u ul në gjunjë dhe tha: "Jemi të kënaqur që Allahu është Zoti ynë, Islami feja jonë dhe Muhamedi (s.a.v.s.) i Dërguari ynë." I Dërguari i Allahut (s.a.v.s.) heshti kur Omeri tha këto fjalë e më pas tha: "Pasha Atë, në Dorën e të Cilit është shpirti im, sapo m'u paraqitën Xheneti dhe Zjarri përgjatë këtij muri ndërsa isha duke u falur, dhe nuk kam parë kurrë mirësi e ligësi si sot."