Transmeton Ibn Mes'udi: Teksa po ecja bashkë me Pejgamberin (s.a.v.s.) në një nga arat e Medines, ai po mbështetej në një degë palme që e mbante me vete. Ne kaluam pranë një grupi hebrenjsh, ku disa prej tyre i thanë njëri-tjetrit: "Pyeteni atë për shpirtin". Disa të tjerë thanë: "Mos e pyetni, që të mos thotë diçka që nuk do t'ju pëlqejë". Megjithatë, disa prej tyre thanë: "Gjithsesi do ta pyesim". Atëherë një burrë prej tyre u ngrit dhe tha: "O Ebul-Kasim! Çfarë është shpirti?". Pejgamberi (s.a.v.s.) heshti dhe unë e kuptova se po i zbriste shpallja. Pastaj ai recitoi: "Të pyesin ty për shpirtin. Thuaj: Shpirti është çështje që i takon vetëm Zotit tim, ndërsa juve nuk ju është dhënë nga dija veçse pak".