Transmeton Muhamed ibn Sirini: Një burrë erdhi te Omer ibn el-Hatabi dhe i tha: "Unë dhe një shoku im po bënim gara me kuaj drejt një shtegu të ngushtë malor dhe vramë një gazelë, ndërkohë që ishim në ihram. Çfarë mendon për këtë?" Omeri i tha një burri që kishte pranë: "Eja, që të gjykojmë unë dhe ti." Ata gjykuan që dëmshpërblimi të ishte një dhi. Burri u largua duke thënë: "Ky është Amiru'l-Mu'minini dhe nuk qenka i aftë të gjykojë për një gazelë pa thirrur një burrë tjetër që të gjykojë bashkë me të." Omeri i dëgjoi fjalët e burrit, e thirri dhe e pyeti: "A e lexon suren el-Maide?" Ai u përgjigj: "Jo." Omeri e pyeti: "A e njeh këtë burrin që gjykoi bashkë me mua?" Ai tha: "Jo." Omeri i tha: "Sikur të më kishe thënë se e lexon suren el-Maide, do të të kisha rrahur." Pastaj tha: "Allahu i Bekuar dhe i Lartësuar thotë në Librin e Tij: 'për të cilën gjykojnë dy njerëz të drejtë prej jush, si kurban që do të arrijë në Qabe' (el-Maide, 95), dhe ky është Abdurrahman ibn Aufi."