Transmeton Ibn Omeri: I Dërguari i Allahut (s.a.v.s.) tha: "Më tregoni për një pemë, shembulli i së cilës është si shembulli i muslimanit? Ajo jep frutat e saj në çdo kohë me lejen e Zotit të saj dhe gjethet e saj nuk bien." Më shkoi mendja te pema e hurmës, por ngurrova të flisja pasi aty ishin Ebu Bekri dhe Omeri. Kur ata nuk folën, Pejgamberi (s.a.v.s.) tha: "Ajo është pema e hurmës." Kur u largova me babanë tim, i thashë: "O babai im, më shkoi mendja se ishte pema e hurmës." Ai tha: "Çfarë të pengoi ta thuash? Sikur ta kishe thënë, do të ishte më e dashur për mua se kjo e ajo." I thashë: "Nuk më pengoi asgjë tjetër, përveçse pashë që as ti e as Ebu Bekri nuk folët, andaj nuk desha të flas."