Transmeton Xhabiri: Isha i pranishëm në namaz me të Dërguarin e Allahut (s.a.v.s.) në ditën e Bajramit. Ai e filloi me namazin para hytbes, pa ezan dhe pa ikamet. Kur e përfundoi namazin, u ngrit duke u mbështetur te Bilali, e lavdëroi dhe e madhëroi Allahun, i këshilloi njerëzit, ua përkujtoi atyre obligimet dhe i nxiti në bindje ndaj Allahut. Pastaj u largua dhe shkoi te gratë, ndërsa Bilali ishte me të. I urdhëroi ato që t'i frikësohen Allahut, i këshilloi dhe ua përkujtoi atyre obligimet. E lavdëroi dhe e madhëroi Allahun, pastaj i nxiti ato në bindje ndaj Tij dhe tha: "Jepni sadaka, sepse shumica prej jush jeni lëndë djegëse e Xhehenemit." Një grua nga mesi i tyre, me faqe të murrme, tha: "Përse, o i Dërguari i Allahut?" Ai tha: "Sepse ankoheni shumë dhe jeni mosmirënjohëse ndaj bashkëshortëve tuaj." Atëherë ato filluan t'i hiqnin gjerdanët, vathët dhe unazat e tyre, duke i hedhur në rrobën e Bilalit si sadaka.