Transmeton Ebu Hurejra se Pejgamberi (s.a.v.s.) ka thënë: "Kur besimtari është në prag të vdekjes, i vijnë melaiket e mëshirës me një pëlhurë prej mëndafshi të bardhë dhe i thonë: 'Dil e kënaqur dhe e pëlqyer drejt mëshirës së Allahut, drejt kënaqësisë dhe drejt një Zoti që nuk është i zemëruar.' Ajo del me një aromë më të mirë se misku, saqë melaiket ia kalojnë njëra-tjetrës derisa e sjellin te dera e qiellit. Atje thonë: 'Sa aromë e mirë kjo që ju ka ardhur nga Toka!' Pastaj e dërgojnë te shpirtrat e besimtarëve, të cilët gëzohen për të më shumë sesa ndonjëri prej jush kur i kthehet i afërmi i tij që i kishte munguar. Ata e pyesin: 'Çfarë bëri filani? Çfarë bëri filani?' Ata thonë: 'Lëreni të qetë, sepse ai ishte në mundimet e dynjasë.' Kur ai thotë: 'A nuk erdhi ai te ju?', ata thonë: 'Ai është dërguar në humnerën e Xhehenemit.' Kurse kafiri, kur është në prag të vdekjes, i vijnë melaiket e dënimit me një pëlhurë të ashpër dhe i thonë: 'Dil e pakënaqur dhe e urryer drejt dënimit të Allahut të Plotfuqishëm dhe të Madhërishëm.' Ajo del me një erë më të fëlliqur se ajo e një kufome, derisa e dërgojnë te dera e Tokës, ku thonë: 'Sa erë e fëlliqur është kjo!', derisa e sjellin te shpirtrat e kafirëve."