Transmeton Shedad ibn el-Had:

Një burrë nga beduinët erdhi te Pejgamberi (s.a.v.s.), i besoi atij dhe e ndoqi atë, pastaj tha: "Do të bëj hixhret me ty." Pejgamberi (s.a.v.s.) porositi disa nga shokët e tij që të kujdeseshin për të. Gjatë një beteje, Pejgamberi (s.a.v.s.) mori disa robër si plaçkë lufte dhe i ndau ata, duke i caktuar edhe atij një pjesë. Shokët e tij ia dhanë atë që i ishte ndarë. Ai kishte qenë duke u kujdesur për kafshët e tyre dhe kur erdhi, ata ia dhanë pjesën e tij. Ai pyeti: "Çfarë është kjo?" Ata i thanë: "Një pjesë që Pejgamberi (s.a.v.s.) e ka ndarë për ty." Ai e mori atë, erdhi te Pejgamberi (s.a.v.s.) dhe tha: "Çfarë është kjo?" Ai tha: "Ta kam ndarë ty." Ai tha: "Nuk të kam ndjekur për këtë. Por të kam ndjekur që të goditem këtu – dhe bëri me shenjë nga fyti i tij – me një shigjetë, e të vdes e të hyj në Xhenet." Pejgamberi (s.a.v.s.) tha: "Nëse je i sinqertë me Allahun, Allahu do ta vërtetojë sinqeritetin tënd (duke ta plotësuar dëshirën)." Pas pak kohe, ata u ngritën për të luftuar armikun, pastaj ai u soll te Pejgamberi (s.a.v.s.) i mbartur, pasi ishte goditur nga një shigjetë pikërisht aty ku kishte treguar. Pejgamberi (s.a.v.s.) pyeti: "A është ai?" Ata i thanë: "Po." Ai tha: "Ai u tregua i sinqertë me Allahun, ndaj edhe Allahu ia vërtetoi sinqeritetin e tij." Pastaj Pejgamberi (s.a.v.s.) e qefini me xhyben e tij, e vendosi para vetes dhe ia fali Namazin. Gjatë lutjes së tij u dëgjua të thoshte: "O Allah, ky është robi Yt që doli si muhaxhir në rrugën Tënde dhe u vra si shehid; unë jam dëshmitar për këtë."