Transmeton Ibn Abasi: Ajetet në suren El-Maide, të cilat Allahu i Madhëruar i shpalli: "Gjyko mes tyre ose shmangu prej tyre" e deri te "...ata që veprojnë me drejtësi", zbritën lidhur me çështjen e dëmshpërblimit të gjakut (dijes) mes fiseve En-Nadir dhe Kurejza. Kjo sepse të vrarët e fisit En-Nadir konsideroheshin me pozitë fisnike dhe për ta paguhej dëmshpërblimi i plotë, ndërsa për fisin Beni Kurejza paguhej vetëm gjysma e dëmshpërblimit. Ata kërkuan gjykimin e të Dërguarit të Allahut (s.a.v.s.) për këtë çështje, andaj Allahu i Madhëruar zbriti këto ajete për ta. I Dërguari i Allahut (s.a.v.s.) i udhëzoi ata në të vërtetën dhe e bëri dëmshpërblimin e gjakut të barabartë për të dy palët.