Transmetojnë Seleme dhe Ja’la ibn Umeje:

Dolëm së bashku me të Dërguarin e Allahut (s.a.v.s.) në fushatën e Tebukut. Me ne ishte një shoku ynë, i cili u pëlesh me një burrë nga muslimanët. Burri e kafshoi atë në parakrah, ndërsa ai e tërhoqi dorën me forcë nga goja e tij, me ç'rast burrit i ra dhëmbi. Ai erdhi te Pejgamberi (s.a.v.s.) për të kërkuar dëmshpërblim, e ai (s.a.v.s.) tha: "A shkon dikush prej jush te vëllai i tij dhe e kafshon ashtu siç kafshon deveja mashkull, e pastaj vjen e kërkon dëmshpërblim? Nuk ka dëmshpërblim për këtë." Kështu, i Dërguari i Allahut (s.a.v.s.) e shpalli këtë kërkesë të pavlefshme.