Transmeton Ebu Kebshe el-Enmari: I Dërguari i Allahut (s.a.v.s.) ka thënë: "Për tri gjëra betohem dhe po ju tregoj një thënie, prandaj mbajeni mend: Pasuria e një robi nuk pakësohet nga sadakaja; çdo rob që pëson një padrejtësi dhe bën durim ndaj saj, Allahu vetëm sa ia shton nderin; dhe çdo rob që hap derën e lypjes, Allahu ia hap atij derën e varfërisë (ose diçka të ngjashme). Po ju tregoj edhe një thënie tjetër, prandaj mbajeni mend: Dynjaja u takon katër lloj njerëzve: Një robi të cilin Allahu e ka furnizuar me pasuri dhe dije, e ai i frikësohet Zotit të tij me to, mban lidhjet farefisnore dhe e njeh të drejtën e Allahut në to. Ky është në gradën më të lartë. Një robi të cilin Allahu e ka furnizuar me dije, por nuk i ka dhënë pasuri, e ai ka nijet të sinqertë dhe thotë: 'Sikur të kisha pasuri, do të veproja si filani'. Ai shpërblehet sipas nijetit të tij, kështu që shpërblimi i të dyve është i njëjtë. Një robi të cilin Allahu e ka furnizuar me pasuri, por nuk i ka dhënë dije, e ai e shpenzon pasurinë e tij kuturu e pa dije, nuk i frikësohet Zotit të tij, nuk mban lidhjet farefisnore dhe nuk e njeh të drejtën e Allahut në të. Ky është në gradën më të keqe. Dhe një robi të cilin Allahu nuk e ka furnizuar as me pasuri e as me dije, e ai thotë: 'Sikur të kisha pasuri, do të veproja si filani'. Ai gjykohet sipas nijetit të tij, kështu që mëkati i të dyve është i njëjtë."