Transmeton Ebu Hurejre se ai u takua me Said b. el-Musaijibin dhe i tha: "E lus Allahun që të na bashkojë mua dhe ty në tregun e Xhenetit." Saidi pyeti: "A ka treg në të?" Ai u përgjigj: "Po, i Dërguari i Allahut (s.a.v.s.) më ka informuar se kur banorët e Xhenetit të hyjnë në të, do të zënë vendet e tyre sipas vlerës së veprave të tyre. Pastaj do t'u jepet leje për të vizituar Zotin e tyre, për një kohëzgjatje sa dita e xhumasë prej ditëve të kësaj bote. Ai do t'ua shfaqë atyre Arshin e Tij dhe do t'u shfaqet atyre në një kopsht prej kopshteve të Xhenetit. Për ta do të vendosen minbere prej drite, prej margaritari, prej jakuti, prej zeberxhedi, prej ari dhe prej argjendi. Më i poshtmi prej tyre – e në mesin e tyre nuk ka të poshtëm – do të ulet mbi kodra misku dhe kafuri, e nuk do të mendojnë se ata që janë ulur në karrige kanë vend më të mirë se ata." Ebu Hurejre tha: "I thashë: 'O i Dërguari i Allahut, a do ta shohim Zotin tonë?' Ai (s.a.v.s.) tha: 'Po, a keni dyshim në shikimin e diellit apo të hënës në natën e plotë?' Ne thamë: 'Jo.' Ai tha: 'Po kështu nuk do të dyshoni në shikimin e Zotit tuaj. Nuk do të mbetet askush në atë tubim pa biseduar Allahu me të drejtpërdrejt, derisa do t'i thotë njeriut prej tyre: 'O filan, i biri i filanit, a e mban mend ditën kur ke thënë këtë dhe atë?' – duke ia kujtuar disa nga gabimet e tij në dunja. Ai do të thotë: 'O Zot, a nuk më fale?' Ai do të thotë: 'Po, me gjerësinë e faljes Sime ke arritur në këtë gradë ku je.' Ndërkohë që janë në atë gjendje, do t'i mbulojë një re nga lart dhe do të lëshojë mbi ta një erë të këndshme, aromën e së cilës nuk e kanë ndier kurrë më parë. Zoti ynë i Madhëruar do të thotë: 'Çohuni drejt asaj që kam përgatitur për ju prej bujarisë Sime dhe merrni çfarë të dëshironi.' Atëherë do të vijmë te një treg i rrethuar nga melekët, ku ka gjëra që syri nuk i ka parë, veshi nuk i ka dëgjuar dhe as nuk i kanë shkuar ndërmend zemrës së njeriut. Aty do të na jepet çfarëdo që dëshirojmë. Në atë treg nuk shitet e as nuk blihet. Në atë treg banorët e Xhenetit do të takohen me njëri-tjetrin. Njeriu me gradë të lartë do të takojë atë që është në gradë më të ulët – e askush nuk është i poshtëm – dhe do të mahnitet nga rrobat që sheh tek ai. Ende pa përfunduar biseda, do t'i perfytyrohet se rrobat e tij janë edhe më të bukura, sepse në Xhenet nuk i takon askujt të jetë i trishtuar. Pastaj do të kthehemi në banesat tona dhe do të na presin bashkëshortet tona duke na thënë: 'Mirë se vini! Jeni kthyer me një bukuri më të madhe se ajo me të cilën u larguat prej nesh.' Ne do t'u themi: 'Sot kemi qëndruar me Zotin tonë, të Plotfuqishmin, dhe na takon të kthehemi me këtë që u kthyem.'"