Transmeton el-Bara'i: Ishte zakon ndër shokët e Muhamedit (s.a.v.s.) që, nëse ndonjëri prej tyre agjëronte dhe vinte koha e iftarit, por e zinte gjumi para se të hante, ai nuk hante atë natë dhe as ditën pasuese deri në mbrëmje. Kajs bin Sirme el-Ensariu ishte duke agjëruar dhe kur erdhi koha e iftarit, shkoi te bashkëshortja e tij e i tha: "A ke ushqim?" Ajo u përgjigj: "Jo, por do të shkoj e të kërkoj për ty." Ai kishte punuar gjatë gjithë ditës dhe e zuri gjumi. Kur erdhi bashkëshortja e tij dhe e pa, i tha: "Mjerë për ty!" Rreth mesit të ditës pasuese atij i ra të fikët. Kjo gjë iu përmend Pejgamberit (s.a.v.s.) dhe atëherë u shpall ky ajet: "Ju është lejuar që gjatë natës së agjërimit të keni marrëdhënie me gratë tuaja." Ata u gëzuan pa masë për këtë. (Dhe u shpall): "Hani e pini derisa të dallohet qartë për ju filli i bardhë i agimit nga filli i zi."