Transmeton Ibn Abbasi: Disa hebrenj erdhën te Pejgamberi (s.a.v.s.) dhe i thanë: "O Ebu el-Kasim! Na trego për bubullimën, çfarë është ajo?" Ai tha: "Është një melek prej melekëve, i cili është i ngarkuar me retë. Ai ka me vete rrufe prej zjarri me të cilat i shtyn retë kudo që dëshiron Allahu." Ata thanë: "Po ky zë që dëgjojmë, çfarë është?" Ai tha: "Është zëri i tij duke i nxitur retë kur i shtyn ato derisa të mbërrijnë atje ku janë urdhëruar." Ata thanë: "E thave të vërtetën." Pastaj thanë: "Na trego se çfarë i ndaloi vetes së tij Israeli?" Ai tha: "Ai vuante nga dhimbja e nervit shiatik dhe nuk gjeti asgjë që i bënte dobi përveç mishit të devesë dhe qumështit të saj, prandaj i bëri ato të ndaluara." Ata thanë: "E thave të vërtetën."