Transmeton gjyshi i Amr bin Shuajbit: Ishte një burrë që quhej Merthed bin Ebi Merthed, i cili bartte të robërit nga Meka në Medine. Në Mekë jetonte një grua lavire e quajtur Anak, e cila kishte qenë mikeshë e tij. Ai i kishte premtuar njërit prej të robërve të Mekës se do ta lironte. Ai tregon: "Erdha derisa arrita te hija e një muri në Mekë në një natë me hënë. Erdhi Anaka dhe pa hijen e trupit tim pranë murit. Kur m’u afrua, më njohu dhe tha: 'Merthed?' Iu përgjigja: 'Merthedi'. Ajo tha: 'Mirë se erdhe! Eja dhe kalo natën te ne.' I thashë: 'O Anak, Allahu e ka ndaluar zinanë.' Ajo thirri: 'O njerëz të tendave! Ky është njeriu që po ua merr të robërit tuaj!' Tetë burra m’u vunë pas. Unë ndoqa rrugën e Handamesë dhe hyra në një shpellë. Ata erdhën dhe qëndruan mbi kokën time e filluan të urinojnë, saqë urina e tyre më binte mbi kokë, por Allahu i verboi dhe nuk më panë. Pasi u larguan, u ktheva te shoku im për ta bartur – ai ishte njeri i rëndë – derisa mbërrita tek Idhkiri. Atje ia hoqa vargonjtë dhe fillova ta bartja, duke më ndihmuar edhe ai, derisa arritëm në Medine. Shkova te i Dërguari i Allahut (s.a.v.s.) dhe i thashë: 'O i Dërguari i Allahut, a mund të martohem me Anakun?' I Dërguari i Allahut (s.a.v.s.) heshti dhe nuk më ktheu përgjigje derisa zbriti ajeti: 'Laviri nuk martohet me tjetërkush përveç me laviren ose me idhujtaren; edhe me laviren nuk martohet kush tjetër përveç lavirit ose idhujtarit. Kjo u është ndaluar besimtarëve.' Atëherë i Dërguari i Allahut (s.a.v.s.) tha: 'O Merthed, laviri nuk martohet me tjetërkush përveç me laviren ose me idhujtaren, andaj mos u marto me të!'"