Transmeton Aishja: Sikur i Dërguari i Allahut (s.a.v.s.) të kishte fshehur diçka nga ajo që i është shpallur, ai do të fshihte këto ajete: "Kur ti i thoshe atij, të cilin Allahu e kishte begatuar (me Islam) dhe ti i kishe bërë mirë (duke e liruar): 'Mbaje gruan tënde dhe ki frikë Allahun!' Por ti fshihje në veten tënde atë që Allahu do ta bënte të dukshme dhe u frikësoheshe njerëzve, ndërkohë që Allahu meriton më shumë që t'i frikësohesh" deri te fjala e Tij: "Dhe urdhri i Allahut duhej të zbatohej" (33:37). Kur i Dërguari i Allahut (s.a.v.s.) u martua me të, njerëzit thanë: "Ai u martua me gruan e djalit të vet", andaj Allahu i Madhëruar zbriti ajetin: "Muhamedi nuk është babai i asnjërit prej burrave tuaj, por ai është i Dërguari i Allahut dhe Vula e Pejgamberëve" (33:40). I Dërguari i Allahut (s.a.v.s.) e kishte birësuar atë kur ishte i vogël dhe ai vazhdoi të quhej Zejd bin Muhamed derisa u rrit, pastaj Allahu zbriti: "Thirrini ata sipas etërve të tyre; kjo është më e drejtë tek Allahu. E, nëse nuk ua dini etërit e tyre, atëherë ata janë vëllezërit tuaj në fe dhe të afërmit tuaj (mevali)" (33:5). Pra, filani është mevali i filanit dhe filani është vëllai i filanit. "Kjo është më e drejtë tek Allahu" do të thotë se kjo është më e drejta para Allahut.