Transmeton Sa’d bin Hishami:

Erdha në Basra dhe takova Abdullah bin Abbasin, të cilin e pyeta për namazin e vitrit. Ai më tha: "A dëshiron të të tregoj për njeriun që ka njohuritë më të mëdha për namazin e vitrit të të Dërguarit të Allahut (s.a.v.s.)?" I thashë: "Po." Ai tha: "Ajo është nëna e besimtarëve, Aishja. Shko te ajo, pyete dhe pastaj kthehu e më trego se çfarë do të të thotë." Shkova te Hakim bin Aflahu dhe i kërkova të vinte me mua te Aishja, por ai hezitoi sepse ishte distancuar nga dy grupet (e përfshira në trazira). Megjithatë, këmbëngula derisa pranoi dhe shkuam bashkë. Kur e përshëndetëm, ajo e njohu zërin e Hakimit dhe pyeti: "Kush është ky?" I thashë: "Sa’d bin Hishami." Ajo pyeti: "I biri i Hishamit?" I thashë: "Hisham bin Amirit." Ajo tha: "Njeri i mrekullueshëm, ai ra dëshmor në ditën e Uhudit." Pastaj i thashë: "Na trego për moralin e të Dërguarit të Allahut (s.a.v.s.)." Ajo më tha: "A nuk e lexon Kuranin?" I thashë: "Po." Ajo tha: "Vërtet, morali i të Dërguarit të Allahut (s.a.v.s.) ishte Kurani." Desha të ngrihesha e të mos pyesja më askënd për asgjë derisa të takohesha me Allahun, por pastaj m'u kujtua namazi i natës.