Transmeton Xhabir bin Abdullahu:

I Dërguari i Allahut (s.a.v.s.) na mbajti një hytbe dhe tha: "O njerëz! Pendohuni tek Allahu para se të vdisni. Nxitoni në kryerjen e punëve të mira para se të preokupoheni (me sëmundje apo pleqëri). Ruajeni lidhjen mes jush dhe Zotit tuaj duke e përmendur Atë sa më shumë dhe duke dhënë sa më shumë sadaka, fshehurazi dhe haptazi. Atëherë do të pajiseni me rrizk, do të ndihmoheni dhe gjendja juaj do të përmirësohet. Ta dini se Allahu ua ka bërë obligim Xhumanë në këtë vend timin, në këtë ditë, në këtë muaj, në këtë vit, deri në Ditën e Kiametit. Kushdo që e lë atë, qoftë gjatë jetës sime apo pas vdekjes sime, qoftë nën udhëheqjen e një prijësi të drejtë apo të padrejtë, duke e nënçmuar atë apo duke e mohuar, Allahu mos i dhëntë qetësi dhe mbarësi në punët e tij. Vërtet, namazi i tij nuk do të jetë i vlefshëm, zeqati i tij nuk do të jetë i vlefshëm, haxhi i tij nuk do të jetë i vlefshëm, agjërimi i tij nuk do të jetë i vlefshëm dhe veprat e tij të mira nuk do t'i pranohen, derisa të pendohet. Kush pendohet, Allahu ia pranon pendimin. Asnjë grua nuk duhet të jetë imame e një burri, asnjë beduin nuk duhet të jetë imam i një muhaxhiri dhe asnjë i prishur nuk duhet të jetë imam i një besimtari, përveç nëse detyrohet nga pushteti dhe i frikësohet shpatës apo fshikullit të tij."