Transmeton Enes bin Maliku: Teksa ishim ulur në xhami, hyri një burrë i hipur mbi deve. Ai e bëri devenë të gjunjëzohej në xhami, pastaj e lidhi atë dhe u tha: "Cili prej jush është Muhamedi?" I Dërguari i Allahut (s.a.v.s.) ishte i mbështetur në mes tyre, kështu që ata i thanë: "Ky njeriu me lëkurë të bardhë që është i mbështetur." Burri i tha atij: "O biri i Abdul-Mutalibit!" Pejgamberi (s.a.v.s.) i tha: "Të përgjigjem." Burri tha: "O Muhamed! Unë do të të pyes dhe do të jem i rreptë në pyetje, prandaj mos u hidhëro me mua." Ai i tha: "Pyet çfarë të duash." Burri i tha: "Të betoj në Zotin tënd dhe Zotin e atyre që ishin para teje, a të ka dërguar Allahu te të gjithë njerëzit?" I Dërguari i Allahut (s.a.v.s.) tha: "Pasha Allahun, po." Ai tha: "Të betoj në Allahun, a të ka urdhëruar Allahu t'i falësh pesë namazet gjatë ditës dhe natës?" I Dërguari i Allahut (s.a.v.s.) tha: "Pasha Allahun, po." Ai tha: "Të betoj në Allahun, a të ka urdhëruar Allahu të agjërosh këtë muaj çdo vit?" I Dërguari i Allahut (s.a.v.s.) tha: "Pasha Allahun, po." Ai tha: "Të betoj në Allahun, a të ka urdhëruar Allahu ta marrësh këtë sadaka nga të pasurit tanë e t'ua shpërndash të varfërve tanë?" I Dërguari i Allahut (s.a.v.s.) tha: "Pasha Allahun, po." Burri tha: "Besova në atë që ke sjellë dhe unë jam i dërguari i popullit tim që është pas meje. Unë jam Dimam bin Thalebe, vëllai i fisit Benu Sa'd bin Bekr."