Transmeton Ebu Hurejre se i Dërguari i Allahut (s.a.v.s.) ka thënë: "Jexhuxhët dhe Mexhuxhët gërmojnë çdo ditë derisa, kur pothuajse i shohin rrezet e diellit, përgjegjësi i tyre u thotë: 'Kthehuni dhe do të vazhdojmë gërmimin nesër.' Pastaj Allahu e kthen atë (murin) më të fortë se sa ishte më parë. Kjo vazhdon derisa, kur t'u vijë koha e caktuar dhe Allahu të dëshirojë t'i dërgojë ata kundër njerëzve, ata do të gërmojnë derisa pothuajse t'i shohin rrezet e diellit, e atëherë përgjegjësi i tyre do të thotë: 'Kthehuni dhe do të vazhdojmë gërmimin nesër, në dashtë Allahu (insha-Allah).' Kështu, ata do të kthehen dhe do ta gjejnë ashtu siç e lanë. Atëherë do ta shpojnë dhe do të dalin te njerëzit, duke e pirë të gjithë ujin. Njerëzit do të mbrohen prej tyre në kështjellat e tyre. Ata do të gjuajnë me shigjetat e tyre drejt qiellit dhe ato do të kthehen të mbuluara me gjak, e atëherë do të thonë: 'I mposhtëm banorët e tokës dhe u lartësuam mbi banorët e qiellit.' Atëherë Allahu do të dërgojë një lloj krimbi në qafat e tyre dhe do t'i vrasë përmes tij." I Dërguari i Allahut (s.a.v.s.) tha: "Pasha Atë, në Dorën e të Cilit është shpirti im, kafshët e tokës do të majmen dhe do të shtohen shumë nga mishi i tyre."