Transmeton Ebu Hurejre se Pejgamberi (s.a.v.s.) ka thënë: "Melaqet i vijnë personit që është duke vdekur dhe, nëse njeriu ka qenë i mirë, ato i thonë: 'Dil, o shpirt i mirë që ishe në një trup të mirë, dil i lavdëruar dhe përgëzohu me mëshirë, kënaqësi dhe me një Zot që nuk është i zemëruar'. Kjo i përsëritet derisa ai të dalë, pastaj ngjitet në qiell dhe atij i hapet, e pyetet: 'Kush është ky?' Ata thonë: 'Filani'. Thuhet: 'Mirë se vjen, o shpirt i mirë që ishe në një trup të mirë. Hyr i lavdëruar dhe përgëzohu me mëshirë, kënaqësi dhe me një Zot që nuk është i zemëruar'. Kjo i përsëritet derisa të dërgohet në qiellin mbi të cilin është Allahu i Madhëruar. Ndërsa nëse njeriu ka qenë i keq, ato thonë: 'Dil, o shpirt i fëlliqur që ishe në një trup të fëlliqur. Dil i qortuar dhe përgëzohu me ujë të valë e me qelb,' dhe me ndëshkime të tjera të ngjashme me to. Kjo i përsëritet derisa ai të dalë, pastaj ngjitet në qiell por atij nuk i hapet. Pyetet: 'Kush është ky?' Thuhet: 'Filani'. Atëherë thuhet: 'Nuk ka mirëseardhje për shpirtin e fëlliqur që ishte në një trup të fëlliqur. Kthehu i qortuar, sepse për ty nuk do të hapen dyert e qiellit'. Kështu, ai dërgohet mbrapsht nga qielli dhe pastaj shkon në varr."