Transmeton Ebu Hurejra: Pejgamberi (s.a.v.s.) erdhi te varrezat dhe i përshëndeti ato duke thënë: "Paqja qoftë mbi ju, o shtëpi e popullit besimtar! Ne, në dashtë Allahu i Madhëruar, do t'ju bashkohemi." Pastaj tha: "Dëshiroja t'i kishim parë vëllezërit tanë." Ata thanë: "O i Dërguari i Allahut, a nuk jemi ne vëllezërit e tu?" Ai tha: "Ju jeni shokët e mi. Vëllezërit e mi janë ata që do të vijnë pas meje, ndërsa unë do t'ju pres te Havdi." Ata thanë: "O i Dërguari i Allahut, si do t'i njohësh ata prej umetit tënd që nuk kanë ardhur ende?" Ai tha: "Më tregoni, nëse një burrë ka një kalë me ballë të bardhë dhe me këmbë të bardha mes kuajve krejtësisht të zinj, a nuk do ta njihte ai atë?" Ata thanë: "Gjithsesi." Ai tha: "Vërtet, ata do të vijnë në Ditën e Kiametit me fytyra dhe gjymtyrë të shndritshme nga gjurmët e abdestit. Unë do t'i pres ata te Havdi." Pastaj tha: "Vini re! Disa njerëz do të dëbohen nga Havdi im ashtu siç dëbohet deveja e humbur. Unë do t'i thërras: 'Ejani këtu!' Por do të thuhet: 'Ata ndryshuan pas teje dhe u kthyen prapa.' Atëherë unë do të them: 'Largohuni, largohuni!'"