Transmeton Ebu Hurejra:

Iu luta Allahut që të na bashkojë mua dhe ty në tregun e Xhenetit. Saidi pyeti: "A ka treg në të?" Ai u përgjigj: "Po. I Dërguari i Allahut (s.a.v.s.) më ka treguar se kur banorët e Xhenetit të hyjnë në të, do të zënë vendet e tyre sipas veprave të tyre. Pastaj do t'u jepet leje për një kohëzgjatje sa dita e Xhumasë në këtë botë, kur ata do ta vizitojnë Allahun e Madhëruar. Arshi i Tij do t'u shfaqet atyre dhe Ai do t'u paraqitet në një nga kopshtet e Xhenetit. Për ta do të vendosen minbere prej drite, minbere prej margaritari, minbere prej rubini, minbere prej zmeraldi, minbere prej ari dhe minbere prej argjendi. Ata që janë në pozitë më të ulët - e asnjëri prej tyre nuk do të jetë i parëndësishëm - do të rrinë mbi kodrina prej misku dhe kafuri, e nuk do të mendojnë se ata që janë ulur në minbere kanë vend më të mirë se ata."

Ebu Hurejra tha: "Unë pyeta: 'O i Dërguari i Allahut, a do ta shohim Zotin tonë?' Ai tha: 'Po. A keni dyshim se e shihni diellin apo hënën në natën kur ajo është e plotë?' Ne thamë: 'Jo.' Ai tha: 'Po ashtu nuk do të keni asnjë dyshim në shikimin e Zotit tuaj të Madhëruar. Nuk do të mbetet asnjë në atë tubim me të cilin Allahu i Madhëruar të mos bisedojë drejtpërdrejt, derisa do t'i thotë njërit prej jush: "O filan, a nuk të kujtohet dita kur ke bërë këtë e këtë?" - dhe do t'ia kujtojë disa nga gjërat e kësaj bote. Ai do të thotë: "O Zoti im, a nuk më ke falur?" Allahu do të thotë: "Po, pikërisht me gjerësinë e faljes Sime ke arritur në këtë gradë ku je."' Ndërsa ata do të jenë në këtë gjendje, një re do t'i mbulojë nga lart dhe do të lëshojë mbi ta një erëmirë, aromën e së cilës nuk e kanë ndjerë kurrë më parë. Pastaj Ai do të thotë: 'Ngrihuni dhe shkoni drejt asaj që kam përgatitur për ju si nderim, dhe merrni çfarë të dëshironi.' Kështu, ne do të vijmë në një treg të rrethuar nga melekët, në të cilin ka gjëra që syri nuk i ka parë, veshi nuk i ka dëgjuar dhe as nuk i kanë shkuar ndërmend zemrës së njeriut. Çdo gjë që dëshirojmë do të na sillet. Atje nuk do të ketë as shitje e as blerje. Në atë treg banorët e Xhenetit do të takohen me njëri-tjetrin. Njeriu me pozitë të lartë do të takojë atë që është në pozitë më të ulët se ai - e asnjëri prej tyre nuk do të jetë i parëndësishëm - dhe ai do të mahnitet nga rrobat që sheh tek ai. Ende pa mbaruar bisedën e tij, do t'i shfaqen rroba edhe më të bukura se ato. Kjo sepse atje askush nuk duhet të jetë i trishtuar.

Pastaj do të kthehemi në shtëpitë tona ku do të na presin bashkëshortet tona, të cilat do të thonë: 'Mirë se vini! Jeni kthyer me më shumë bukuri dhe erë të mirë sesa kur u larguat nga ne.' Ne do t'u themi: 'Sot qëndruam me Zotin tonë të Madhëruar dhe na takon të kthehemi kështu siç u kthem.'"