Transmeton Xhabir bin Abdullahu: Kur u vra Abdulla bin Amr bin Haram në ditën e Uhudit, i Dërguari i Allahut (s.a.v.s.) më takoi dhe më tha: "O Xhabir, a dëshiron të të tregoj se çfarë i tha Allahu babait tënd?" (Jahja shton në transmetimin e tij: Ai tha: "O Xhabir, përse po të shoh kështu të thyer shpirtërisht?") Unë thashë: "O i Dërguari i Allahut, babai im ra shehid dhe la pas familje e borxhe." Ai tha: "A dëshiron të të përgëzoj me atë që Allahu i tha babait tënd?" Thashë: "Po, o i Dërguari i Allahut." Ai tha: "Allahu nuk i ka folur askujt kurrë përveçse pas një velloje, ndërsa babait tënd i foli drejtpërdrejt dhe i tha: 'O robi Im, kërko diçka prej Meje që të ta jap.' Ai tha: 'O Zot, më kthe në jetë që të vritem për hir Tënd për të dytën herë.' Zoti, i Madhëruar qoftë Ai, tha: 'Unë tashmë kam vendosur që ata nuk do të kthehen më tek ajo (jeta).' Ai tha: 'Zoti im, atëherë njoftoji ata që kanë mbetur pas meje.' Atëherë Allahu i Lartësuar shpalli: 'E asnjëherë mos i mendoni si të vdekur ata që janë vrarë në rrugën e Allahut. Përkundrazi, ata janë të gjallë te Zoti i tyre, duke u furnizuar.'"