Transmeton Abdullah ibn Omeri: Ai u nis për Umre gjatë kohës së trazirave dhe tha: "Nëse pengohem të arrij te Shtëpia, do të veprojmë ashtu siç vepruam me të Dërguarin e Allahut (s.a.v.s.)." Ai u nis dhe hyri në Ihram për Umre e vazhdoi derisa arriti në el-Bejda. Atje iu drejtua shokëve të tij dhe tha: "Urdhri për të dyja (Haxhin dhe Umren) është i njëjtë. Ju dëshmoj se e kam bërë të detyrueshëm Haxhin së bashku me Umren." Ai vazhdoi derisa erdhi te Shtëpia, bëri tavaf rreth saj shtatë herë dhe eci mes Safas e Marvas shtatë herë, pa shtuar asgjë më shumë. Ai e konsideroi këtë të mjaftueshme për të dhe theri kurban.