Transmeton Seleme: Ne luftuam kundër fisit Fezare nën komandën e Ebu Bekrit, të cilin e kishte emëruar i Dërguari i Allahut (s.a.v.s.). Kur ishim vetëm një orë larg vendit ku armiku furnizohej me ujë, Ebu Bekri na urdhëroi të pushonim gjatë pjesës së fundit të natës, e pastaj u lëshuam në sulm. Arritëm te uji, ku u vranë disa dhe disa të tjerë u zunë robër. Unë pashë një grup njerëzish, mes të cilëve kishte gra dhe fëmijë, dhe kisha frikë se mos po arrinin në mal para meje. Atëherë hodha një shigjetë mes tyre dhe malit dhe, kur e panë shigjetën, ata ndaluan. I solla ata duke i prirë, e mes tyre ishte një grua nga fisi Fezare që mbante veshur një rrobë prej lëkure. Bashkë me të ishte edhe vajza e saj, e cila ishte ndër vajzat më të bukura të arabëve. I solla derisa arrita te Ebu Bekri, i cili ma dha atë vajzë si shpërblim. Mbërritëm në Medinë dhe unë ende nuk e kisha prekur atë, kur i Dërguari i Allahut (s.a.v.s.) më takoi në treg e më tha: "O Seleme, ma dhuro atë grua mua." Unë i thashë: "O i Dërguari i Allahut, pasha Allahun, ajo më ka pëlqyer shumë dhe ende nuk e kam prekur." Të nesërmen, i Dërguari i Allahut (s.a.v.s.) më takoi përsëri në treg dhe më tha: "O Seleme, ma dhuro atë grua mua, Allahu e bekoftë babanë tënd!" Atëherë unë i thashë: "Ajo është e jote, o i Dërguari i Allahut! Pasha Allahun, unë nuk e kam prekur atë." Pastaj i Dërguari i Allahut (s.a.v.s.) e dërgoi atë te njerëzit e Mekës dhe e dha si shpengim për lirimin e disa muslimanëve që mbaheshin robër në Mekë.