Transmeton Seleme b. el-Ekve': Dola përpara se të thirrej ezani i sabahut. Devetë mjelëse të të Dërguarit të Allahut (s.a.v.s.) po kullotnin në Dhu Karad. Më takoi një rob i Abdurrahman b. Aufit dhe më tha: "Devetë mjelëse të të Dërguarit të Allahut (s.a.v.s.) janë grabitur." I thashë: "Kush i ka marrë?" Ai u përgjigj: "Fisi Gatafan." Atëherë lëshova tri thirrje të forta: "O ndihmë!" (Ja sabahah!). Bëra që thirrja ime të dëgjohej në mbarë hapësirën midis dy fushave vullkanike të Medines. Pastaj u nisa me vrap pas tyre derisa i arrita në Dhu Karad, pikërisht kur ata po bëheshin gati t’u jepnin ujë kafshëve të tyre. Duke qenë se isha harkëtar, fillova t'i gjuaja me shigjeta duke thënë: "Unë jam djali i el-Ekve'it, sot është dita e shkatërrimit të të poshtërve!" Vazhdova kështu derisa i shpëtova devetë mjelëse prej tyre dhe u mora atyre tridhjetë mantela. Atëherë erdhi Pejgamberi (s.a.v.s.) bashkë me njerëzit e tjerë. I thashë: "O i Dërguari i Allahut, unë i kam penguar ata të pinin ujë ndërsa ishin të etur, prandaj dërgo tani një forcë ndaj tyre." Ai (s.a.v.s.) tha: "O djali i el-Ekve'it, ti arrite atë që deshe, tani tregohu i butë." Pastaj u kthyem dhe i Dërguari i Allahut (s.a.v.s.) më mori pas vetes në devenë e tij derisa hymë në Medine.