Transmeton Sehl bin Sa'di: Të Dërguarit të Allahut (s.a.v.s.) i ishte përmendur një grua arabe, kështu që ai e urdhëroi Ebu Usejdin që të dërgonte dikë tek ajo. Ai dërgoi njerëz dhe ajo erdhi e u vendos në fortesat e fisit Beni Saide. I Dërguari i Allahut (s.a.v.s.) doli derisa erdhi tek ajo dhe hyri brenda, ku gjeti një grua me kokë të ulur. Kur i Dërguari i Allahut (s.a.v.s.) i foli asaj, ajo tha: "Kërkoj mbrojtjen e Allahut prej teje." Ai tha: "Tashmë të kam dhënë mbrojtje prej meje." Njerëzit i thanë asaj: "A e di se kush është ky?" Ajo u përgjigj: "Jo." Ata i thanë: "Ky është i Dërguari i Allahut (s.a.v.s.), ka ardhur të të kërkojë për martesë." Ajo tha: "Unë qenkam më e pafatja për këtë që bëra." Sehli vazhdoi: Atë ditë, i Dërguari i Allahut (s.a.v.s.) u nis derisa u ul në sqifenë e fisit Beni Saide bashkë me shokët e tij. Pastaj i tha Sehlit: "Na jep të pimë." Sehli tha: Unë e nxora këtë enë për ta dhe u shërbeva me të. Ebu Hazimi tregon se Sehli ua kishte nxjerrë atë enë dhe ata kishin pirë prej saj. Më vonë, Omer bin Abdulazizi ia kërkoi atë si dhuratë dhe ai ia dhuroi. Në transmetimin e Ebu Bekr bin Is’hakut thuhet se fjala e tij ishte: "Na jep të pimë, o Sehl."