Transmeton Abdullahu, robi i liruar i Esma bint Ebu Bekrit:

Esmaja më dërgoi te Abdullah b. Umeri dhe më tha: "Më ka arritur lajmi se ti i ndalon tri gjëra: rrobën e zbukuruar me shirita mëndafshi, mbulesën e kuqe të shalës prej mëndafshi dhe agjërimin e plotë të muajit Rexhep." Abdullahu më tha: "Sa i përket asaj që përmende për Rexhepin, po ai që agjëron vazhdimisht? Ndërsa për rrobën me shirita, e kam dëgjuar Omer b. Hattabin duke thënë se e ka dëgjuar të Dërguarin e Allahut (s.a.v.s.) të thotë: 'Mëndafsh vesh vetëm ai që nuk ka pjesë në ahiret', prandaj u frikësova se shiritat mund të jenë pjesë e tij. Kurse për mbulesën e kuqe të shalës, ja kjo është mbulesa e Abdullahut dhe ajo është e kuqe."

U ktheva te Esmaja dhe e njoftova, e ajo tha: "Kjo është xhybeja e të Dërguarit të Allahut (s.a.v.s.)." Ajo më nxori një xhybe prej stofi persian me jakë të punuar me mëndafsh të rëndë (dibaxh) dhe me mëngë të qepura me po këtë mëndafsh. Ajo tha: "Kjo xhybe ishte te Ajsheja derisa ajo ndërroi jetë, e pastaj e mora unë. Pejgamberi (s.a.v.s.) e vishte atë, ndërsa ne e lajmë atë për të sëmurët dhe kërkojmë shërim përmes saj."