Transmeton Ebu Hurejre: Dy burra, një musliman dhe një hebre, u fyen mes vete. Muslimani tha: "Pasha Atë që e zgjodhi Muhamedin (s.a.v.s.) mbi të gjitha botët!" Ndërsa hebreu tha: "Pasha Atë që e zgjodhi Musain mbi të gjitha botët!" Atëherë muslimani ngriti dorën dhe e goditi hebreun me shuplakë në fytyrë. Hebreu shkoi te i Dërguari i Allahut (s.a.v.s.) dhe e njoftoi për atë që ndodhi mes tij dhe muslimanit. I Dërguari i Allahut (s.a.v.s.) tha: "Mos më jepni përparësi ndaj Musait, sepse njerëzit do të alivanosen dhe unë do të jem i pari që do të vijë në vete, kurse Musai do të jetë duke u mbajtur për anën e Arshit. Nuk e di nëse ai do të jetë prej atyre që do të alivanoset e do të vijë në vete para meje, apo do të jetë prej atyre që Allahu i ka përjashtuar."